İran İslam Respublikasının Bakı XI Beynəlxalq Kitab Sərgisində fəal iştirakı

İran İslam Respublikasının Bakı XI Beynəlxalq Kitab Sərgisində fəal iştirakı

Azərbaycan Respublikasının Mədəniyyət Nazirliyinin təşkilatçılığı ilə 2025-ci il 1–7 oktyabr tarixlərində (1404-cü il, 9–15 mehr) Bakı şəhərində “Texno-insan: Dünənin əfsanəsi, bu günün hadisəsi” şüarı altında XI Beynəlxalq Kitab Sərgisi keçirilir.

Sərginin açılış mərasimində Azərbaycan Respublikasının ədəbi və ictimai xadimləri ilə yanaşı, müxtəlif ölkələrin diplomatik korpuslarının rəhbərləri, o cümlədən İran İslam Respublikasının Azərbaycandakı fövqəladə və səlahiyyətli səfiri cənab Müctəba Dəmirçilu iştirak etmişdir.

Bu sərgidə 24 ölkədən 60-dan çox xarici, eləcə də 100-dən artıq yerli nəşriyyat təmsil olunur. Azərbaycan Respublikasının tanınmış yazıçı və şairləri, həmçinin beynəlxalq səviyyədə məşhur müəlliflər əsərlərini və elmi nailiyyətlərini təqdim edirlər.

Bu dəfəki sərgi kitab təqdimatları, tematik panel müzakirələri, təlim seminarları, imza günləri və ədəbi müsabiqələri əhatə edən geniş proqramla müşayiət olunur. Beynəlxalq nəşriyyat sahəsində əməkdaşlığın dərinləşdirilməsi məqsədilə sərgi çərçivəsində ikitərəfli və çoxtərəfli görüşlərin təşkili üçün ayrıca imkanlar yaradılmışdır. Ümumilikdə sərgi müddətində 250-dən artıq tədbirin keçirilməsi nəzərdə tutulur.

Cari sərgidə İran İslam Respublikasının Kitab və Ədəbiyyat Evi ölkəmizi 20 kvadratmetrlik stendlə təmsil edir. Təqdim olunan nəşrlər arasında klassik və müasir ədəbiyyat, uşaq və yeniyetmələr üçün əsərlər, iranşünaslıq, fars dili tədrisi, elmi-tədqiqat işləri, tarix, mədəniyyət və incəsənət mövzularında, həmçinin müxtəlif janrlarda 400-dən artıq kitab yer almışdır. Stenddə “Şəm və Meh” və “Nimaj” nəşriyyatlarının, eləcə də “Səlcuq” Ədəbiyyat Agentliyinin nümayəndələri iştirak edir, beynəlxalq əməkdaşlığa dair müzakirələr aparırlar.

Eyni zamanda, İran Kitab və Ədəbiyyat Evi yerli nəşriyyat və agentliklərlə əməkdaşlıq çərçivəsində fars dilindən digər dillərə tərcümə, İran nəşriyyat potensialının təqdimatı, kitab oxumağın təşviqində müasir texnologiyaların rolu, həmçinin İran və Azərbaycan arasında mədəni əməkdaşlığın inkişafı mövzularına həsr olunmuş bir sıra ixtisaslaşmış tədbirlərin keçirilməsini planlaşdırır.

İran stendində həmçinin “İran İslam Respublikasının İlin Beynəlxalq Kitabı” mükafatı və Tehran Beynəlxalq Kitab Sərgisi barədə geniş məlumat təqdim olunmuşdur. Bu iştirak fars dilinin və mədəniyyətinin təbliği, beynəlxalq əməkdaşlığın, xüsusən də tərcümə və müəllif hüquqları sahəsində əlaqələrin inkişafı baxımından mühüm imkan olmaqla yanaşı, İranın mədəni diplomatiya və ədəbi mübadilə sahəsində mövqeyinin möhkəmləndirilməsinə xidmət edir.

Sərginin ilk günündə İran stendi geniş maraqla qarşılanmışdır. İran İslam Respublikasının Azərbaycandakı səfiri cənab Müctəba Dəmirçilu stendi ziyarət edərək, nəşriyyat nümayəndələri ilə görüşmüşdür. Bununla yanaşı, Qətər, Rusiya və Venesuela səfirləri, Azərbaycan Milli Məclisinin Mədəniyyət Komitəsinin sədri cənab Polad Bülbüloğlu, Yazıçılar Birliyinin sədri cənab Anar Rzayev və digər ictimai-mədəni xadimlər İran stendi ilə tanış olmuşlar.