İran nümayəndəsi Bakıda keçirilən CICA Gənclər Şurasının 8-ci iclasında birinci yerə layiq görülüb

İran nümayəndəsi Bakıda keçirilən CICA Gənclər Şurasının 8-ci iclasında birinci yerə layiq görülüb

Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (CICA) Gənclər Şurasının səkkizinci iclasında İran İslam Respublikasını təmsil edən Behruz Kiani birinci yerin qalibi olub.

Tehran Universitetinin Beynəlxalq Münasibətlər ixtisası üzrə magistrantı olan Behruz Kiani, “Sülhün, əməkdaşlığın və dayanıqlı inkişafın təşviqində gənclərin rolu” mövzusunda təqdim etdiyi məqalə ilə CICA-nın süni intellekt mövzusuna həsr olunmuş bədii və elmi məqalə müsabiqəsində Əsas Mükafata layiq görülüb.

Müəllif öz məqaləsində Asiya qitəsində 15–24 yaş aralığında 700 milyondan artıq gəncin mövcudluğuna diqqət çəkərək, gənclərin CICA-nın əsas məqsədləri olan sülhün möhkəmləndirilməsi, əməkdaşlığın dərinləşdirilməsi və dayanıqlı inkişafın təmin olunmasında oynadığı mühüm və strateji rolu vurğulayıb.

Kiani məqaləsində gənclərin CICA çərçivəsində regional proseslərdə iştirakının institusionallaşdırılması məqsədilə üç əsas təklif irəli sürüb:

1. CICA Daimi Gənclər Strukturunun yaradılması – üzv ölkələrin gəncləri arasında davamlı və qarşılıqlı əməkdaşlığı təmin etmək məqsədilə;
2. CICA Gənclər İnnovasiya Fondunun təsis edilməsi – gənclər tərəfindən hazırlanmış innovativ layihələrin maliyyələşdirilməsi üçün;
3. Gənclərin təmsilçiliyinin institusionallaşdırılması – milli gənclər məşvərət şuralarının yaradılması və CICA iclaslarında rəsmi nümayəndə heyətlərinə gənc nümayəndələrin daxil edilməsi yolu ilə.

Qeyd edək ki, CICA-nın Səkkizinci Gənclər Şurasının iclası noyabrın 12-dən etibarən Bakıda işə başlayıb və cümə gününə qədər davam edəcək.