Cənab Kazım Qəribabadi CICA-nın Bakıdakı VII Zirvə görüşündə iştirak və çıxış edib
.
İran İslam Respublikası Xarici İşlər Nazirliyinin Hüquqi və Beynəlxalq məsələlər üzrə müavininin Bakıda keçirilən AQEM-in (CICA) VII Zirvə görüşündə iştirakı və çıxışı
İran İslam Respublikası Xarici İşlər Nazirliyinin Hüquqi və Beynəlxalq məsələlər üzrə müavini Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM / CICA) Bakıda keçirilən VII Zirvə görüşündə çıxış edərək, İranın təhlükəsizlik təhdidləri, eləcə də ABŞ və sionist rejiminin son təcavüzləri qarşısında mövqeyini izah etmiş, bu rejimin AQEM mexanizmindən xaric olunmasını tələb etmişdir. Həmçinin İran nümayəndə heyəti digər 13 ölkə ilə birlikdə əlaqələndirilmiş şəkildə sionist rejimin nümayəndəsinin çıxışı zamanı iclas zalını tərk etmişdir.
Cənab Kazım Qəribabadi İran İslam Respublikası Xarici İşlər Nazirliyinin Hüquqi və Beynəlxalq məsələlər üzrə müavini qismində Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) VII Zirvə görüşündə iştirak etmək məqsədilə Azərbaycan Respublikasının paytaxtı Bakı şəhərinə səfər etmişdir.
Zirvə görüşünün ümumi iclasının gedişində cənab Qəribabadinin başçılıq etdiyi İran İslam Respublikasının nümayəndə heyəti sionist rejimi başçısının iştirakı və çıxışına etiraz olaraq iclas zalını tərk etmişdir. Bu addım digər 13 ölkənin nümayəndə heyətləri tərəfindən də dəstəklənmişdir. Cənab Kazım Qəribabadi tədbirdəki rəsmi çıxışında bölgənin həssas təhlükəsizlik şəraitinə və BMT Nizamnaməsinə toxunaraq, İran İslam Respublikasının mövqeyini aşağıdakı kimi açıqlamışdır:
- İran xalqı son aylarda ABŞ və sionist rejimi tərəfindən qeyri-qanuni hərbi hücumların və suverenlik pozuntularının hədəfi olmuşdur. Mühüm infrastrukturun, Agentliyin nəzarəti altında olan dinc nüvə obyektlərinin hədəfə alınması, günahsız vətəndaşların və məktəblilərin şəhid edilməsi beynəlxalq hüququn açıq-aşkar pozulmasıdır. İran BMT Nizamnaməsinin 51-ci maddəsinə əsasən, özünü müdafiə etmək üzrə hüququndan istifadə etmiş və istənilən təcavüzə qətiyyətli cavab verəcəkdir.
- Sionist rejimi Qərbi Asiyada əsas təhlükə mənbəyidir. AQEM-ə üzv olan ölkələrin bu cinayətlər qarşısında səssiz qalmayaraq bu rejimi AQEM mexanizmindən xaric etmək üçün tədbir görmələrinin vaxtı çatmışdır.
- Regiondankənar qüvvələrin iştirakı heç vaxt sabitlik gətirməmişdir. Fars körfəzinin və Hörmüz boğazının qorunması region ölkələrinin borcudur. Gəmiçilik təhlükəsizliyi sahil ölkələrinin təhlükəsizliyindən ayrı deyil və bunun praktiki həlli təcavüzlərə son qoyulması, dəniz blokadasının tamamilə ləğv edilməsi və İranın ərazi bütövlüyünə hörmət edilməsidir.
- İran İslam Respublikası qonşuları ilə ən yaxşı münasibətlər arzulayır, lakin gözləyir ki, heç bir ölkə İrana hücum etmək məqsədilə öz ərazisini təcavüzkarların ixtiyarına verməsin.
1992-ci ildə əsası qoyulmuş AQEM (CICA) mexanizminin İran İslam Respublikası da daxil olmaqla 28 üzvü var və onun yeddinci zirvə toplantısı Bakının ev sahibliyi ilə keçirilmişdir.